ผญา คำสัญญาอ้าย

……………………

กลอนที่  1

………………….

คันนางปันใจให่   อ้ายสิหมั่นมาหา

สัญญาว่าสิฮัก  ปั๊กใจแต่นางน้อง

คันเป็นทองแผ่นเดียวได้  สิฮักแพงบ่แหนงหน่าย

แม่นสิทุกข์ยากไฮ้  ไปหน่าหากว่ามี

อ้ายสิดีนำเจ้า   กินข้าวเปล่าเหลือปลา

มีผ่าผืนแพรวา  สิห่มกายให่นางน้อง

ยามมีของกินหน่อย  สิคอยนางกินอิ่มก่อน

อ้ายสิกินข้าวขี่หล่อน  นอนพื้นห่มหมอน  พุ้นแหล่ว  นางเอย

……………………

กลอนที่  2

……………………

ฮักกันมาโดนแล้ว  หลายปีบ่มีเปลี่ยน

ใจยังเวียนฮักเจ้า  บ่มีมื้อเปลี่ยนแปลง

ส่วนว่าคำแพงอ้าย  กะคือดั่งเดียวกัน

ผูกสัมพันธ์แพงฮัก  ปั๊กใจฮักแพงอ้าย

สายสัมพันธ์คงหมั่น  นานปีกะคือเก่า

จึงสัญญาต่อเจ้า   อ้ายฮักแล้วบ่เปลี่ยนใจ

ในชีวิตของอ้าย  สิมีนางข่างผ่าห่ม

อ้ายสิจ่มว่าฮักเจ้า   จนฮอดเถ่าแก่ชรา

ชีวิตวันข่างหน่า   ฮาทุกข์ยากปากหมอง

ของกินมีบ่พอกัน  อ้ายสิยอมกินแต่น้ำ

ยามแบ่งของคันมีหน่อย   อ้ายสิคอยเจ้าได้ก่อน

หมอนบ่มีอ้ายสิให่   หนุนแขนอ้ายต่างหมอน

ตอนฮ่างมีอ้ายบ่ถิ่ม  ยามทุกข์จนอ้ายบ่ปล่อย

อ้ายสิคอยซ้วนเจ้าไว้  ให่เทียมข่างบ่ห่างกาย  ซั้นแหล่ว  นางเอย

…………………

กลอนที่  3

…………………

ดีใจหลายอ้ายถืกเลือก     เป็นคนฮ่วมทางชีวิต

เป็นลิขิตจากสวรรค์         ให่พัวพันเป็นแฟนน้อง

คันเป็นทองแผ่นเดียวแล้ว          สิฮักแพงบ่แหนงหน่าย

อ้ายสิเซาเป็นขี่เหล่า        เลิกเจ้าชู้คบหมู่พาล

สิทำงานอย่างมุ่งหมั่น       สานฮักเฮาให่อบอุ่น

หนุนครอบครัวให่คงหมั่น      สร่างฝันให่เป็นความจริง

สิ่งใดดีอ้ายสิสร่าง                 ทางใดดีอ้ายสิท่อง                    

เงินทองอยู่ฟากน้ำ           สินำค้นก่นหา

ชีวิตวันข่างหน่า              ฮาทุกข์ยากปากหมอง

ของกินมีบ่พอกัน             อ้ายสิกินแต่ลมแล้ง

อ้ายสิยอมใส่แห่ง             ให่คำแพงกินอิ่มก่อน

เถิงยามนอนสิปูผ่า            บอกเวลาให่แทนไก่ขัน

อ้ายสิฝ่าฟันสู่                  บุ๊ไปจนฮอดฝั่ง

พานางถึงแห่งห่อง          เฮาฝันไว้ฮ่วมกัน  ซั้นแหล่ว  นางเอย

…………………………

กลอนที่  4

………………………….

อ้ายขอสัญญาไว้  ต่อคำแพงน้องพี่

ฮักอีหลีหวังแต่งเจ้า  เอาเมือซ้อนกล่อมสอง

แต่ว่าบุญของอ้าย  หน่อยบ่พอสิได้ฮ่วม

คนสวมแหวนแม่นอ้าย  คนแต่งเจ้าผัดแม่นเขา

ได้แต่เซาฮักไว้   ส่วนหัวใจยังคึดต่อ

ยังเฝ้ารอมื้อหน่า  ฮาโลกนี้บ่แน่นอน

ฮาเทือจรมาพ้อ   เจ้าฮ้างแฟนจั่งค่อยอ่วย

เจ้ายังสวยสำหรับอ้าย  บ่มีมื้อเปลี่ยนแปลง

คึดฮอดแฮงบ่เห็นหน่า  ได้แต่ว่าฝันเอา

เจ้าอยู่ดีหรือว่าใด๋  ลูกสาวใหญ่ส่ำใด๋แล้ว

สวยได้แนวแม่หรือไม่   ลูกชายเจ้ามีหรือไป่

เป็นจั่งใด๋พ่อตู้เจ้า  เถ่าแล้วหรือว่าใด๋

ส่วนว่าโตของอ้าย  สำบายดีบ่คือเก่า

ย้อนว่าเป็นผู้เถ่า     นานมื้อแฮงเถ่าหลาย

แต่ว่าหัวใจอ้าย   ฮักเจ้าหลายคือเก่า

ฮักแต่สาวฮอดเถ่า   บ่มีมื้อเปลี่ยนใจ 

ยามใด๋ได้พ้อหน่า  ได้สบตาแฮงฮักตื่ม

ฮักบ่ลืมแม่นฮักเจ้า  อยากนอนเฝ้าบ่ห่างกาย  ซั้นแหล่ว  นางเอย

 

…………………..

กลอนที่  5

…………………

เถิงยามทุกข์บ่มีท้อ  สิพาถ่อเฮือพาย

ยามสบายสิดูแล    ฮักแพงไปหน่า  

สัญญาอ้าย    จากใจที่หมั่นเที่ยง

บ่เอียงไปพุ้นพี้        หนีไปเรื่อยจั่งผู้นำ  ดอกนา  นางเอย

 

 

 

 

 

 


ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *