ผญากู้เงินดอก

……………………………

กลอนที่  1

คันบ่จนให่เอิ้นครูบา

…………………………..

      ธกส.ให่กูกู้  เป็นเงินกูแล้วตั๊วห่า

พาไปหาอีหล่า  กูสิข่าหยั่งคืน

มืนตากะบ่ขึ่น  เมาหลายเงินกะเหี่ย

ลูกเมียคองอยู่บ้าน  พากันจ้ำแจ่วบอง

    เงินทองที่กู้ได้  ยามใช้เขาเอาดอกตื่ม

เงินกู้ยืมติดดอกไว้  เถิงยามใช้จั่งส่วงเมา

ต้องขายนาขายข้าว  ขายลูกสาวแถมตื่ม

ใช้เงินยืมทั้งดอกต้น  บ่จนให่เอิ้นครูบา  พี่น้องเอย

………………….

กลอนที่ 2

นายประกัน

………………

     กู้เงินแล้วเป็นหนี่  กะยังว่าพอไค

หมู่เอาเงินหนีไป  บ่ใช้เขาเฮาเป็นหนี่

ย้อนใจดีหมู่กู้  เฮาประกันให่จำจื่อ

จำฮอดมื้อมอดม้วย  คันรวยแล้วสาธุนำ  พี่น้องเอย

………………………….

กลอนที่  3

กู้ได้ฮอดมื้อตาย

………………………

    กูกู้เงินมาได้  มันกะแม่นเงินกู

เรื่องใช้คืนอย่าสิหวัง  ฟ้องเอาคันอยากได้

หากู้ไปคู่หม่อง  ดอกท่อใด๋กะบ่เกี่ยง

เพียงเห็นหน่าขึ่นบ้าน   เจ้าหนี่ย้านบอกบ่มี

    ยามที่จำเป็นนั้น   กู้ไผบ่ได้ดอก

เจ้าหนี่บอกกันไว้  เครดิตเจ้าบ่มี

คันเครดิตดีแล้ว  กู้ไผมันกะง่าย

เป็นหนี่แล้วชดใช้   กู้ได้ฮอดมื้อตาย  พี่น้องเอย

………………………………

กลอนที่  4

หาเงินนำจอบเหี่ยน

…………………………….

     กู้เงินไปหาเล่น  การพนันขันต่อ

พอแต่คึดกะเจ้งแล้ว  ใช้คืนนั้นอย่าสิหวัง

มีแต่พังไปหน่า  เซาคึดสาดีกว่า

หาเงินนำจอบเหี่ยน  ยังสิได้หลายกว่ากัน  พี่น้องเอย

……………………………….

กลอนที่  5

กู้เงินมาซื้ออยู่ซื้อกิน

………………………………

     คันกู้เงินมาใช้  เพื่อซื้ออยู่ซื้อกิน

บ่ทันโดนกะเป็นวิน  นำหนี่สินพูนเพิ่ม

ดอกเบี้ยเติมทบต้น  ทุกนาทีที่เปลี่ยนผ่าน

บ้านที่นาม้าช้าง   ขายใช้หนี่กะบ่พอ  พี่น้องเอย

………………………………..

กลอนที่  6

นานมื้อเป็นหมื่นแสน

……………………………….

    กู้เงินดอกเบี้ยถืก     ใช้ดอกแพงนี่เข่าท่า

ฟ้าวกู้มาอย่าชักช้า      ไปใช้หนี่อย่างด่วนจี๋

หนี่อยู่ใสตามไปใช้        อย่าไว้ใจเงินกู้เพิน

เงินต้นเพียงหลักร้อย      นานมื้อเป็นหมื่นแสน  พี่น้องเอย

………………………………..

กลอนที่  7

เฮาสิมอละแหม่งม้วย

……………………………….

    กู้เงินมาลงทุนนั้น   คึดให่คักสิเฮ็ดหยัง

เป็นตาได้กำไร   คืนทุนมื้อใด๋แท้

อย่าวอแวแล่นนำช้าง  หางยาวสนุ้กแกว่ง

เฮาสิมอละแหม่งม้วย   ยามเงินกู้ดอกเบี้ยบาน  พี่น้องเอย

………………………….

กลอนที่  8

กู้เงินมาสร่างบ้าน

………………………….

     กู้เงินมาหลักล้าน  สร่างเฮือนซานได้โอ่อ่า

หมากับแมวกะได้หน่า  อยู่เฮือนโก้โอ่โถง

เจ้าของเฮือนหลังโก่ง  ส่งหนี่สินจนจ่อย

จ้ำแต่ส่มปลาน้อย  ลาบงัวนั้นต้องฝันเอา  พี่น้องเอย

……………………………..

กลอนที่  9

กู้เงินมาเล่นการเมือง

……………………………..

     กู้เงินมาลงเล่น   การเมืองเป็นเรื่องใหญ่

จ่ายท่อใดกะเมิดเกลี้ยง   เสียงดังแท้แน่นอน

แต่ว่าตอนกาเลือก  เสือกบ่กาตามเงินจ่าย

กะเลยตายก๊องด๊อง  ยามเงินกู้ดอกเบี้ยบาน  พี่น้องเอย 

………………………..

กลอนที่  10

กู้กองทุนเงินล้าน

……………………….

 กู้กองทุนเงินล้าน   ดอกเบี้ยบานปีละเทือ

บานยามใด๋เหื่อย้อยก้น     ต้องหากู้ผู้เพินมี

คันส่งดีบ่คาค้าง     ได้กู้ใหม่มาใช้เขา

เพิ่นเอาดอกร้อยละสาม     ตามเงินที่เฮากู้

ผู้ลังคนร้อยละห่า      แล้วแต่ว่าสิให่กัน

คันวันเดียวสองวัน       กันเองดอกห้าร้อย

กู้หมื่นเดียวดอกหน่อย     ลึ้งแก่นกันดอกคงที่

 เครดิตดีกู้ได้     ดอกห่าร้อยดั่งเดิม

คันสิกู้เงินเพิ่ม   กะต้องผ่านกรรมการ

เพินให่กู้แต่บริวาร    กั้บลูกหลานในเคือค่าย

คันเว้าหลายเพินอาฆาต  จองเวรเฮาเมิดหมู่

ได้แต่ดูปากบ่ได้     คันเพินให่กะจั่งเอา  พี่น้องเอย

……………………………………

กลนที่  11

เซียนโค่นเซียน

…………………………………

กู้เงินดอกรายวันนั้น  เป็นรายการเซียนโค่นเซียน

ระหว่างเซียนกู้เงิน  แล้วทำเฉยบ่เคยใช้

มีแต่กู้ไปหน่า   หากู้กินบ่เคยจ่าย

หากู้ยืมไปเรื่อย   กู้ได้แล้วส่ำขอ

พอมาเจอเจ้าหนี่  รุ่นใหม่ทันสมัย

มีทนายเป็นแบล็ค  หนุนหลังจ่ายเงินกู้

มีหน่วยหนูหน่าเหี้ยม  หาเก็บเงินแบบใหม่

ไผบ่ยอมส่งใช้   หุ่มฮ้ายด่าประจาน

แต่ละวันไล่บี้  เก็บหนี่เงินผ่อนส่ง

ไผบ่ตรงทำท่าเบี้ยว  เทียวไล่บี้สิฆ่าตี

แม่นสิหนีไปลี้  กะตามเห็นได้ทุกที่

ตามราวีพวกนักกู้  กูกู้ได้ส่ำขอ

พอแต่การกู้เริ่ม  การเก็บเงินกะตามยาว

ลูกหนี่โชว์ฝีเท้า   แบ่งเงินต้นจ่ายคืน

การขัดขืนเริ่มขึ่น   การทวงถามกะหนักหน่วง

ควงอาวุธมีดไม้  หุ่มฮ้ายสิฆ่าตี

พวกลูกหนี่ขี่ย้าน   กะหาเงินมาจ่าย

พวกขี่อายแล่นลี้  หนีจากบ้านชั่วคราว

พวกที่เอาตายสู้   กูมีบ่หนีบ่จ่าย

ฮวมกันไปขอร้อง  ศูนย์ดำรงธรรมให่ซอยเหลือ

บางคนเฟือเฟียข่าง  ตำรวจใหญ่นายอำเภอ

แต่กะเจอทางตัน  ซ่อยเหลือกันกะบ่ได้

มีแต่แนะแนวให่   ไปจ่ายเขาห่ามกู้ใหม่

เถิงฏีกากะซ่อยบ่ได้  กู้ไปแล้วต้องใช้เขา

ร้อยละซาวกะถืกต้อง  ลองเข่าเบิ่งในฎีกา

เพิ่นว่าเป็นสมยอม  ของผู้เซ็นสัญญากู้

อ่านดูบ่ถืกต้อง  เจ้าเซ็นหละญาแม่

หรือสิหวังเล่นแง่  กูกู้ได้ส่ำขอ  ซั้นบ้อ  ลูกหนี่เอย

…………………………………..

กลอนที่  12

หนีอย่างเดียว

………………………………..

พากันกู้เงินเล่น  การพนันเบี้ยโบก

หวังสิโชคต่างหล่าง  เป็นนายห่างส่ำหมู่เขา

แต่บ่เป็นคือเว้า  เมิดคู่บาทคู่สตางค์

ทางสิได้เงินคืน  ต๊กไกลปานยิงแฮ้ง

หวังนำขายของแห่ง  พริกหอมในตลาด

เกือบขาดทึนคู่มื้อ   เงินสิใช้กะบ่มี

พวกทวงหนี่ไล่บี้   หนีไปคนละทีป

บีบน้ำตาทำท่าย้าน  ให่ชาวบ้านเพินหลูโตน

ผู้ลังคนขอร้อง  วิงวอนให่หมู่ซ่อย

ข่อยจั่งซั้นจั่งซี้   บ่มีใช้ ติ๊ะดอกแพง

สตางค์แดงเดียวยังบ่ใช้  หาเรื่องใส่เจ้าหนี่เขา

ตอนที่เฮากู้ยืม  เป็นหยังจั่งบ่เว้า

เอาเงินเขามาแล้ว  ต้องใช้คืนมันจั่งแมน

อย่าสิหวังแข่นแข่น  ให่หมู่ใช้ซ่อยเฮา

คนอื่นกะกินข้าว  คือเฮานี่หละท่าน

แม่นสิหวานคำเว้า   เขากะฮู้ว่าบ่จริง

สิ่งเดียวที่ทำได้  คือหนีไปให่สุดกู่

พวกเงินกู้หนีแล้ว  ค่อยแจวอ้าวต่าวคืน  ลูกหนี่เอย

 


One thought on “ผญากู้เงินดอก

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *