ผญาอวยพรวันเกิด

………………

อวยพร  1

……………….

วันเกิดท่านมื้อนี้  ยินดีหลายได้มาฮ่วม

มาตุ้มโฮมกินข้าว  กับมาเว้ากล่าวอวยพร

 ขอกราบวิงวอนไหว้   พระรัตนตรัยให้ดลซ่อย

เทวดาใหญ่น้อย   มาซ่อยคุ้มอย่าสิไล

กับทั้งดลบันดาลให้  ท่านอยู่ดีมีสุขยิ่ง

สิ่งใดดีให้หลั่งเข้า  สิ่งใด้ฮ้ายให้หลั่งหนี 

ได้มีเป็นคือคึดไว้  สุขสำบายม่วนซื่น

อายุยืนบ่เจ็บไข้   สมใจท่านคู่สู่อัน เด้อ สาธุ

………………

อวยพร  2

……………….

วันเกิดเอื้อยมื้อนี้  ดีใจหลายได้มาฮ่วม

มาตุ้มโฮมกินข้าวน้ำ  ฉลองให่ม่วนยิน

สิ่งศักดิ์สิทธิ์ทั้งสิ้น  ให้มาเบิ่งมาแยง

ผู้บ่าวหุ่มฮักแพง   แต่งค่าดองได้เป็นล้าน

ให่ม่วนมันไปหน่า  สวยใสซิ่งกว่าเก่า

โชคลาภไหลหลั่งเข้า  โฮมเจ้าคู่สู่วัน

ให้สุขสันติ์ซาบซ่า    ม่วนชื่นโฮแซว

 แนวใดดีให้หลั่งมา   สมปรารถนาทุกด้าน    เด้อเอื้อยเดอ

………………

อวยพร  3

……………….

มื้อนี้วันเกิดอ้าย ดีใจหลายได้มาฮ่วม

มาตุ้มโฮมกินข้าวน้ำ  ฉลองให่ม่วนมัน

ขอให้ฝันของอ้าย  เป็นจริงทุกสิ่งอย่าง

ย่างนำทางแตกตึ้มตึ้ม  สาวส่ำน้อยแห่แหน

แฟนกะหลายหมู่กะล้น  มีแต่คนอยากเป็นเสี่ยว

สมใจเคียวคู่ด้าน  เงินงานพร้อมคู่สู่อัน

สุขสำบายยืนมั่น      สารพันม่วนชื่น

ทุกวันคืนโชคหลั่งเข้า     อ้ายเจ้าได้เป็นเศรษฐึ  เด้ออ้าย

………………

อวยพร  4

……………….

มื้อนี้วันเกิดน้อง  คนสวยรวยเสน่ห์

ใส่ชุดใด๋กะเท่ห์   เซเป๋ล้มกะผ่องสวย

อ้ายขออวยพรให้   ไชยโยสิทธิโชค

โชคให่มีอยู่เรื่อย  ภัยฮ้ายเจ้าอย่ามี 

ได้แฟนดีหล่อรวยล้น  ความทุกข์จนให้หนีห่าง

สุขสมหวังคู่ด้าน  การเฮียนพร้อมคู่สู่อัน

ให้สุขสันต์ซาบซ่า     สารพันม่วนชื่น

ทุกวันคืนเงินหลั่งเข้า   โฮมให้เจ้ากระเป๋าตุง  เด้อนางเดอ ๆ ตึ้ง ๆ

………………

อวยพร  5

……………….

มื้อนี้วันเกิดน้อง  ชายรองผู้รูปหล่อ

ขออวยพรให้น้อง  สมปองได้ดั่งใจ

ฮักสาวใดกะให้    สาวมีใจฮักต่อ

ทั้งพ่อแม่พี่น้อง  ผู้สาวเจ้าฮักตื่มนำ 

ยามไปขอผู้สาวให้   ค่าบ่แพงต่อง่าย

สุขสำบายคู่ด้าน  เงินงานพร้อมคู่สู่อัน

ให้สุขสันต์ซาบซ่า    ตามประสาคนรูปหล่อ

ขออวยพรส่งท้าย   ตื่มแถมให้หล่อลากดิน   … เด้อ

………………

อวยพร  6

……………….

มื้อนี้..วันเกิดหลานสาวน้อย  สวยใสวัยละอ่อน

ขออวยพรจากใจให้   หลานสาวได้ดั่งฝัน

อายุยืนยาวมั่น    สุขสำราญการเป็นอยู่

ครูอาจารย์หุ่มฮักให้  เกรดสี่ได้คู่วิชา 

การเฮียนให้ก้าวหน้า  การเงินกะให้คล่อง

การทองกะให้ได้   การแฟนให้หล่อดี

ได้มีเป็นคือฝันไว้   สุขสำบายม่วนชื่น

ทุกวันคืนเงินหลั่งเข้า  โฮมให้เจ้ากระเป๋าตุง ..เด้อหลานเอย

(ยังมีต่อ)


One thought on “ผญาอวยพรวันเกิด

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *