ผญาอวยพรแต่งงานครั้งที่สองขึ้นไป

………………..

อวยพร  1

………………..

แต่งเทือก่อนนั้น   ส่ำฝันไปบ่เป็นท่า

ผลามีแต่งเทือนี้   มีเป็นได้ดั่งใจ

ให่เจ้าฮักกันไว้   คือข้าวเหนึ่งใหม่

อย่าได้เพแตกม้าง  คือน้ำถืกข้าวเหนียว

ให่กลมเกลียวกันไว้  พร้อมใจกันฟันฝ่า

ซ่อยกันหาเงินทองไว้  เศรษฐีได้เป็นบ่โดน

ความทุกข์จนบ่มาใกล้  โพยภัยให้ไกลห่าง

สุขสมหวังฮอดแก่เถ่า  ถือไม้เท้าซ่อยกัน  เด้อ  สาธุ

………………..

อวยพร  2

………………..

แต่งเทือก่อนนั้น  ส่ำฝันซั้นดอกเสี่ยว

บ่ต้องเหลียวให้ชอกช้ำ  แต่งเทื่อนี้ส่ำถืกหวย

ได้แฟนสวยรวยพร้อม   เป็นตาแพงแท้นอเสี่ยว

อย่าสุหลบลอดเลี้ยว   ให่เฟือฝั่นอย่างเดียว

จึงขออวยพรให่   สุขสำบายเด้อเสี่ยว

เลิกเคียวตำพุ้นพี้  มีเป็นได้ดั่งฝัน

การงานให้ก้าวหน่า   การเงินกะให้คล่อง

การทองกะให่ได้   การบ้านให่เจ้าม่วนมัน    ซั้นแหล่ว  เสี่ยวเอย

………………..

อวยพร  3

………………..

ได้แต่งงานในเทือนี้   ดีหลายกว่าเทือก่อน

ขออวยพรให่หมู่เจ้า  ฮักฮอดเถ่าบ่ฮ้างกัน

ให้สุขสันต์ซาบซ่า   พากันฮ่างพากันมี

เป็นเศรษฐีเงินถัง   สุขสมหวังดั่งฝันไว้  เด้อ  สาธุ

………………..

อวยพร  4

………………..

เจ้าแต่งงานใหม่แล้ว   ให่แจ๋วเจ๋งเฮงตื่ม

เคยยืมเงินผู้อื่นใช้    ต่อไปนี้ขอให้รวย

ขอให่สวยหล่อซิ่ง   ติ้งลิงติ๋งบ่มีเมื่อย

อยู่เฉยเฉยกะรวยล้น   จนคนเอิ้นว่าเศรษฐี  เด้อ  สาธุ

………………..

อวยพร  5

………………..

นอนผู้เดียวมาโดนแล้ว  คนนอนนำฮ้างห่าง

เหิงจนค้างหมากถั่วฮ้าง  แต่นอนหง่างอยู่ผู้เดียว

มื้อนี้เสี่ยวแต่งใหม่แล้ว   ขออวยพรให่แจ๋วแจ่ม

ได้เมียแถมลูกเต้า   รวยล้นเป็นเศรษฐี  เด้อ  สาธุ

………………..

อวยพร  6

………………..

นอนผู้เดียวหลายปีแล้ว  คนนอนนำฮ้างห่าง

เหิงจนค้างหมากถั่วฮ้าง  ทางเป็นห้วยย้อนเลาะหา

พอมาฮอดมื้อนี้    ดีใจหลายหมู่ได้แต่ง

แสงตะเว็นใกล้ค่ำแล้ว   แจวจากบ้านด่วนมา

เอาของขวัญมาให่  เอาพรชัยมาส่ง

ประสงค์ใดขอให่ได้  สมด้ามด้่งหมาย

สุขสำบายยืนมั่น   ฮักพัวพันบ่เป็นอื่น

ทุกวันคืนสุขซาบซ่า  รวยล้นเป็นเศรษฐี เด้อ  โอมเพี้ยง

………………..

อวยพร  7

………………..

แต่งเทือก่อนนั้น  ส่ำฝันซั้นดอกเสี่ยว

บ่ต้องเหลียวให้ชอกช้ำ  แต่งเทื่อนี้ส่ำถืกหวย

ได้สาวสวยรวยพร้อม   เป็นตาแพงอีกต่างหาก

อย่าสุปากสุเว้า   ให่เฟือฝั่นอย่างเดียว

ให่เลิกเคียวตำพุ้นพี้   มีเมียดีแล้วเด้อท่าน

การงานให้ก้าวหน่า   การเงินนั้นกะให่รวย

การทองกะให่ด้วย   การบ้านสวยสดชื่น

หมั่นยืนจนฮอดมื้อ     ถือไม้เท้าซอยกัน    ซั้นแหล่ว  เสี่ยวเอย

………………..

อวยพร  8

………………..

แต่งมาหลายเทือแล้ว   เป็นนำแนวคนรูปหล่อ

พอแต่งใหม่อีกเทือนี้   กับคนดีพร้อมพร่ำสวย

จึงขออวยพรให้   ฮักแพงบ่แหนงหน่าย

ฮักฮอดมื้อเป็นยายเป็นตาเถ่า   ได้ถือไม้เท้าซอยกัน

สาระพันทรัพย์สินได้   สุขสมหวังดังฝันใฝ่

ลูกหลานหลายเต็มบ้าน  รวยร้อยล้านเป็นเศรษฐี   เด้อ  สาธุ

………………..

อวยพร  9

………………..

ยากย้อนสวยผู้บ่าวหุ่ม  ฮักแพงแต่งหลายเทือ

ได้แต่งใหม่อีกเทือนี้   ให้ดีพร้อมคู่สู่อัน

อยู่นำกันบ่แตกม้าง   ซอยกันถางซ่อยกันก่น

อดทนจนฮอดมื้อ  ถือไม้เท้าซอยกัน

มีลูกหลานหลายขึ้น  ได้ม่วนชื่นโฮแซว 

แนวใดดีให่มีมา   แนวบ่เป็นตาให่หนีสิ้น

ทรัพย์สินไหลหลั่งเข่า  โพยภัยให่ไกลห่าง

สุขสมหวังคู่ด้าน   รวยร้อยล้านเป็นเศรษฐี    เด้อ  สาธุ

………………..

อวยพร  10

………………..

หลายปีที่เป็นหม้าย  สุขสำบายแต่บ่ม่วน

ขาดคู่ซ้วนคู่ซ้อน    นอนแล้งอยู่ผู้เดียว

มื้อนี้เสี่ยวโชคหมานแล้ว   ได้โฮแซวแต่งใหม่

แต่งกับคนสิเฮ็ดให้   มีเป็นได้ดั่งฝัน

จึงอวยพรให้ฮักมั่น   ยืนยาวฮอดมื้อแก่

ดูแลกันฮอดมื้อเฒ่า  ถือไม้เท้าซ่อยกัน

สารพันทรัพย์สินได้  รวยทันใจปานแต่ง

แข็งแรงบ่เจ็บไข้  ลูกหลานได้ดังฝัน

อายุยืนยาวมั่น  ม่วนมันบ่มีเมื่อย

อยู่เฉยเฉยเงินหลั่งเข้า  ดลให้เจ้าเป็นเศรษฐี เด้อ 

(ยังมีต่อครับ)

 

(ยังมีต่อ)


ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *