ผญาอวยพรผู้ย้าย

………………..

อวยพร  1

………………

น้องได้ย้ายสมใจแล้ว    สิแจวไปอยู่หม่องใหม่

ถิ่มให้อ้ายคึดฮอดเจ้า   กลืนข้าวน้ำกะฝืดคอ

อ้ายอยากขอติดตามเจ้า   ไปนำทุกหนแห่ง

ด้วยฮักแพงแต่แรกพ้อ   ขอให้อ้ายได้หล่ำแยง

น้องคำแพงย้ายเมือบ้าน   สุขสำราญการเป็นอยู่

อย่าลืมคึดฮอดอ้าย   ผู้บ่าวเถ่าที่จอบทาง

สุขสมหวังเด้อน้อง   เงินทองให้ลุหลั่ง

คันผิดหวังโทร.เอิ้นอ้าย  สิไปซ้วนเช็ดน้ำตา  น้องเอย

………………..

อวยพร  2

………………

น้องได้ย้ายสมใจแล้ว    สิแจวไปอยู่หม่องใหม่

ถิ่มให้อ้ายคึดฮอดเจ้า   กลืนข้าวน้ำกะบ่ลง

ซงคือสิเป็นไข้    หนาวในในใจสั่น

ใจผูกพันแต่แรกพ้อ  บุญพอได้ส่ำแอบมอง

น้องย้ายจากไปแล้ว  บ่มีแนวสิคึดต่อ

เหลือแต่ฝันท่อนั้น   คันฝันพ้อกะแม่นบุญ 

ขอให้คุณพระไตรยแก้ว แววไวใสส่อง

ดลบันดาลให้น้อง     สุขสมปองได้คู่สู่อัน

คันผิดหวังให้โทร.เอิ้น   สิเดินทางไปหาอุ่น

ไปค้ำคูณหนุนส่งให้   น้องคลายเศร้าเก่าหมอง  น้องเอย

………………..

อวยพร  3

………………

เจ้าได้ย้ายสมใจแล้ว    อย่าลืมแก่วที่เคยเนาว์

อย่าลืมเฮาผู้เคยคอย   ออยเอาใจในยามยาก

ย้ายจากกันเทือนี้   บ่มีคืนมาคือเก่า

จนฮอดแก่ฮอดเถ่า  ได้พบพ้อ  ต่อมื้อฝัน

คันเจ้าไปทางหน้า  ให้โชคหมานคู่สู่อย่าง

ได้คู่สมคู่สร้าง  ที่รวยล้นเป็นเศรษฐี

ให้เจ้ามีเป็นได้   สมใจทุกสิ่งอย่าง

สุขสมหวังสู่ด้าน   เงินงานพร้อมคู่สู่อัน  เด้อ  สาธุ

………………..

อวยพร  4

………………

ข้าขออวยพรให้  เจ้าไปดีมีสุขยิ่ง

สิ่งใดดีให้หลั่งเข้า  สิ่งใดฮ้ายให้หลั่งหนี

ให้เจ้ามีเป็นได้   สมใจเจ้าคู่อย่าง

สุขสมหวังคู่ด้าน  เงินงานพร้อมคู่สู่อัน เด้อ  สาธุ

………………..

อวยพร  5

………………

ชีวิตต่อแต่นี้  ให้มีตั้งแต่ความสุข

อันหมู่มวลความทุกข์  อย่าสิมีมาใกล้

อันหมู่โรคาไข้  หวัดไอให้ไกลห่าง

ได้พ้อทางก้าวหน้า  เจริญขึ้นดั่งฝัน เด้อ  สาธุ

………………..

อวยพร  6

………………

คันเจ้าย้ายไปแล้ว   ให้โฮแซวม่วนซื่น

อายุยืนบ่เจ็บไข้   สดใสพริ้งขึ้นสู่วัน

การงานให้ก้าวหน้า  การเงินกะให้ค่อง

การทองกะให้ได้   สมใจเจ้าปรารถนา เด้อ สาธุ

………………..

อวยพร  7

………………

คันเจ้าย้ายไปแล้ว   แนวใดดีมีกว่าหมู่

แนวใดชั่วถิ่มไว้   ไปดีโลดอย่าห่วงหลัง

หวังใดกะให้ได้  สมดั่งมโนหมาย

สุขสำบายปานพระยา  อยู่ดีบ่มีฮ้อน

สมดังพรที่ผู้ข้า  สาธยายทุกสิ่งอย่าง

ให้สมดังวาดเว้า  สมใจเจ้าคู่สู่อัน เด้อ  สาธุ

………………..

อวยพร  8

………………

เลี้ยงส่งนายมื้อนี้   เพื่อส่งทางก่อนสิจาก

ก่อนสิพลัดพรากบ้าน  ไปเนาว์ยั้งอยู่ถิ่นไกล

จึงขออวยพรให่   ไชยโยสิทธิโชค

โชคให่มีอยู่เรื่อย   ภัยฮ้ายเจ้าอย่ามี

ให้เจ้าสุขีล้น   ความทุกข์จนให้หนีห่าง

สุขสมหวังคู่ด้าน   เงินงานพร้อมคู่สู่อัน  เด้อ  สาธุ

………………..

อวยพร  9

………………

ทางชีวิตข้างหน้า   ให้เลี่ยนไหลไปได้คล่อง

เงินทองให้หลั่งเข้า  โฮมเจ้าคู่สู่วัน

การงานให้ก้าวหน้า   การศึกษาให้เฮืองฮูง

เงินเดือนสูงปีละสองขั้น   เงินตำแหน่งนั้นกะให้มี

เป็นเศรษฐีพันล้าน  สุขสำราญการเป็นอยู่

หมู่พวกซ่อยโอบอุ้ม  ซุมลูกน้องหุ่มแห่แหน

เจ้านายดึงแขนขึ้น    ได้ยืนสูงตำแหน่งใหญ่

ได้มีเป็นดั่งฝันไว้   สมใจเจ้าคู่สู่อัน  เด้อ   สาธุ

………………..

อวยพร  10

………………

คันอ้ายย้ายไปแล้ว  อย่าลืมแจ่วที่เคยกิน

ฝนตกรินคึดฮอดกัน  อย่าลืมสัญญาที่เคยให้

ไปดีแล้ว   อย่าลืมกันเด้อละพี่

อยู่หม่องดีทางพุ้น   อย่าลืมพี้ผู้คึดนำ

ให้อ้ายสุขีล้ำ   บ่มีก่ำดำหมอง

หัวบ่หยองท้องบ่มาน  หล่อปานพระอินทร์แต้ม

ให้แจ่มแจ๋วทุกเรื่อง  บ่เคืองหยังจักอย่าง

สุขสมหวังคู่ด้าน  เงินงานพร้อมคู่สู่อัน เด้อ  อ้ายเอย

………………..

อวยพร  11

………………

คันหมู่ย้ายไปแล้ว  ให้เจ๋งแจ๋วทุกสิ่งอย่าง

ย่างนำทางแตกตึ้มตึ้ม  สาวส่ำน้อยแห่แหน

แฟนกะหลายหมู่กะล้น   คนฮักแพงบ่แหนงหน่าย

เจ้านายซ่อยดึงขึ้น   ยืนอยู่ได้ใหญ่สูง

แนวใดมันยุ่งยาก  ให้จากห่างหนีไกล

แนวใดสุขสำบาย  ให้หลั่งไหลมาโฮมเจ้า

เงินทองไหลหลั่งเข้า   จนเต็มโถงเต็มไถ่

สุขสดใสซาบซ่า   เสียวซ่านคู่สู่คืน เด้อ  หมู่เอย

………………..

อวยพร  12

………………

งานเลี้ยงส่งมื้อนี้  ดีใจหลายได้มาฮ่วม

มาตุ้มโฮมเลี้ยงส่งเจ้า   ไปเนาว์ยั้งอยู่ต่างแดน

ไปตามแผนที่คึดไว้   ไปตามฝันให้เถิงที่

หวังเป็นมีดีได้   ดังใจเจ้าปราถนา

ขอผลานิสงส์ค้ำ   นำส่งถึงหลักชัย

โพยภัยหาย   อันตรายให้หนีเกลี้ยง

ชื่อเสียงให้ดังก้อง  เงินทองให้ลุหลั่ง

สุขสมหวังคู่ด้าน  เงินงานพร้อมคู่สู่อัน  เด้อ  ท่านเอย

………………..

อวยพร  13

………………

งานเลี้ยงส่งมื้อนี้  เพื่อท่านพี่ผู้ย้ายไป

ดีใจได้มาโฮม   เลี้ยงส่งกันในวันนี้

ให้ไปดีเด้ออ้าย  สุขสำบายเด้อท่านพี่

สิ่งใดดีให้หลั่งเข้า  สิ่งใดฮ้ายให้หลั่งหนี

ได้มีเป็นคือฝันไว้   โพยภัยให้ไกลห่าง

ย่างนำทางแตกตึ้มตึ้ม  สาวส่ำน้อยแห่แหน

แฟนกะหลายหมู่กะล้น  ความทุกข์จนให้หนีห่าง

สุขสมหวังคู่สู่ด้าน   ความฝันเจ้าให้เป็นจริง  เด้อท่านพี่เอย

 

 

(ยังมีต่อ)

 

 

 

 


2 thoughts on “ผญาอวยพรผู้ย้าย

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *