ผญากล่าวอำลาสถาบันการศึกษา

ปรับใช้ตามเหมาะสมนะครับ

กราบเรียนท่าน  ผอ.ที่เคารพ

กั้บทั้งขอน้อมนบ  ครูอาจารย์ทุกทุกท่าน

ที่จัดงานเลี้ยงส่งให่  ก่อนลูกศิษย์ไป๋หนีจาก

บุญคุณมากเหลือล้น  จนเต็มห่องหมากหัวใจ

หลายปีได้ความรู้  ประสบการณ์ตั้งหลายอย่าง

เฮ็ดอิหยังบ่ค่อยได้   กะยังให่ได้แก้ ร.

จึงขอถือโอกาสนี้  กราบขอบคุณทุกท่าน

ลูกหลานยังบ่มีแนวสิให่  นอกจากใจน้อมนึกพระคุณ

ยามมีบุญกองข้าว  โรงเรียนเฮาสิมาซ่อย

จัดผ่าป่ากองใหญ่น้อย  มาซอยสร่างคู่สู่ปี

สำบายดีพ่อแม่พร้อม   กรรมการสถานศึกษาทุกท่าน

ที่มางานมื้อนี้  ขอบพระคุณถ่วนคู่สู่คน

ขอบพระคุณอย่างเหลือล้น  ที่ดูแลเอาใจใส่

จนลูกหลานใหญ่เติบกล้า   หน่าบานแล้วคู่สู่คน

มื้อนี้ลูกหลานจนยังบ่มีรายได้  ให่เพิงพาไปสาก่อน..แนเด้อ

ตอนลูกหลานได้งานแล้ว  มีรายได้สิตอบแทน

แม่เมิดแหวนเมิดส่อย     พ่อเมิดนาเมิดไฮ่

ต่อไป๋วันข่างหน่า   สิหาคืนให่ดังเดิม

กั้บสิเติมเต็มให่  เงินต้นดอกที่เสียไป

ลูกหลานให่สัญญา   จากใจในวันนี้

สำบายดีหมู่พวก   มิตรสหายแฟนผู้อื่น

เฮาตื่นจนออกเต้น   ได้เห็นป้ายเลี้ยงส่งลา

จึงอาสามาเว้า  กล่าวอำลาผญาย่อย

ฝอยผญาแทนหมู่เพื่อน  เตือนใจให่คึดฮอดกัน

คันหมู่ไปทางหน่า  พ้องานมาให่ส่งข่าว..แนเด้อ

พ้อบ่าวสาวสวยหล่อซิ่ง  อย่าโทรเอิ้นบอกกัน

หมู่ฉันสวยหร่อแล้ว  โดนนานปีบ่เป็นอื่น

ทุกวันคืนคอยจอบจ้อง  เสียงโทร.ฮ้องส่งใจ

กราบอภัยทุกทุกท่าน   หากผิดพลาดพลั้งไป

โดยตั้งใจบ่ตั้งใจ   โปรดอภัยลูกหลานด้วย

ขออวยพรส่งท้าย    ให่อยู่ดีทุกทุกท่าน 

สุขสำราญทุกถ่วนหน่า  การค้าให้ฮูงเฮือง

 ทั้งการเมืองการมุ้ง  ม่วนมันบ่มีเมือย

หมิดหมับม้อย   เมิดสิ้นอย่าสิมี

สิ่งใดดีให่หลั่งเข่า  โพยภัยให่ไกลห่าง

สุขสมหวังคู่ด้าน   เงินงานพร้อมคู่สู่อัน

นอนหลับนั้น  ได้เงินพันเงินหมื่น

ตื่นขึ้นมาขอให่ได้   เงินคำแก้วหลั่งโฮม 

ทุกท่านทุกคนเด้อครับ……สวัสดีครับ


One thought on “ผญากล่าวอำลาสถาบันการศึกษา

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *