ผญาแนะนำสถานที่

แนะนำสถานที่ต่าง ๆ มี 4 บทกลอน……………………………………

1. แนะนำโรงเรียนบ้านกุดเรือคำ

……………………………………

ปีสองห้าหนึ่งเก้า                                     โรงเรียนเฮาได้เกิดใหม่

เกิดอยู่ใกล้วังเดือนห้า                             มวลพี่น้องให้จือจำ

กุดเรือคำพิทยาคารชื่อชั้น                       มัธยมเปิดใหม่

แต่ก้าวไกลชื่อก้อง                                  ปัญญากว้างก่ายเกิน

สมเด็จพระเทพฯ ทรงดำเนินมาเยี่ยม   ทอดกฐินงานยิ่งใหญ่

ครูอาจารย์นักเรียนได้เข้าเฝ้า                 ศิริมงคลได้ทั่วกัน

ในแต่ละปีนั้น                                             ไปแข่งขันตั้งหลายอย่าง

ได้รางวัลยอดเยี่ยม                                   บ่มีย่อหย่อนไผ

สอบเอ็นกะสอบได้                                   เฮียนมหาลัยตั้งหลายแห่ง

ผอ สุรชัย เฮาบ่แห่งแล้ง                         น้ำใจกว้างปานทะเล

ครูอาจารย์ทุ่มเทให้                                 สอนนักเรียนบ่เหินห่าง

ทางก้าวหน่าหมู่เจ้า                                  ให่เฮาส่างซอยกัน… พี่น้องเอย

……………………………………

2. แนะนำเมืองเจริญศิลป์ 1

…………………………………..

 

เจริญศิลป์ถิ่นแคว้น                             แดนป่าโคกกะปอม

มีหอยหอมเห็ดผักหวาน                    ไข่มดแดงแมงแคงเบ้า

กบอึ่งยางอึ่งเผ้า                                   ดอกกะเจียวจั๊กกะจั่น

เทิงแมงมันแม่เป้ง                                แมงแคงน้อยใหญ่นำ

เกิดอยู่คนละก้ำ                                    ย้ายมาอยู่ฮวมกัน

ต่างผูกพันเกี่ยวดอง                            ฮวมกันส่างเมืองบ้าน

ส่างวิหารหลวงพ่อองค์ดำไว้              เป็นหลักชัยให่เมืองใหม่

จุดฮวมใจให่พี่น้อง                               ค้องใจให่ฮักแพงกัน

ศูนย์ศิลปาชีพนั้น                                  บ้านกุดนาขามขึ่นชื่อ

มีฝีมือทางเครื่องปั้น                             พระราชินีท่านส่งเสริม

หนองทงมนเติมเต็มให่                        เมืองเจริญศิลป์เป็นตาหน่าเบิง

เถิงเมษาหน่าฮ้อน                                ออนซอนฮ้างหม่ายบ่าวสาว

โชว์ขาขาวลงเล่นน้ำ                             ขี่ยางมันม่วนซื่น

บางคนยืนจอบจ้อง                               ส่องกล้องเบิ่งขาขาว

หมู่สาวสวยใสซิ่ง                                 ย่างส่ายแอวฮิมตลิ่ง

แม่ญิงปลอมวี้ดว้าย                         ผู้ชายลี้ย้านสั่นสาย…….พี่น้องเอย

……………………………………

3. แนะนำเมืองเจริญศิลป์  2

……………………………………

 

เจริญศิลป์ถิ่นแคว้น                    แดนป่าโคกผักหวาน

มีอาหารหลากหลาย                  อยู่ในดงพงกว้าง

มีกะปอมกะท้าง                           อีกะปูงูเต่า

ไข่มดแดงแมงเบ้า                       กบอึ่งเผ้าอึ่งหยาง

ย่างนำทางต้องค่อยย่อง             ย้านเหยียบงูหนูกระต่าย

ผักหวานหวายหน่อไม้                 เห็ดแมงเผิ่งต่อแตน

แหงนขึ่นไปเทิงฟ้า                       นกแหลวบินขวักไขว่

เหลียวลงไปอ่างน้ำ                      ปูปลาข่อนปานบวกควย

ลูกสาวสวยพอใช้                         ไปวัดวาบ่อายเพิ่น

หน้าเปิ่นเวินแข่นอั้นตั้น                ขยันพร้อมคู่สู่อัน

เทิงปั่นไหมทอผ่า                          เลี้ยงงัวนมหมัดหมี่

เป็นคนดีใช้ได้                                ใจดีแท้แน่นอน

ออนซอนยามเดือนห่า                   เมษายนคนไปเที่ยว

เล่นน้ำเลิกแล้วเลี้ยว                      โรงแรมเล่นก่อนเมือ

ซุมแก้สิ่นแก้เสื่อ                                 เลาะหาแฟนแน่นอั่ง

ซุมนั่งแนมคนเล่นน้ำ                          ส่องกล้องจังแม่นหลาย พี่น้องเอย

 

…………………………………….

4. แนะนำเมืองเจริญศิลป์ 3

……………………………………

เจริญศิลป์ถิ่นแคว้น                   แดนรวมพลคนหลายเผ่า

ผู้ไทยลาวเจ๊กย้อ                       ไทยกลางใต้ส่วยเขมร

ฮวมกันเป็นเมืองบ้าน                 สานสัมพันธ์หมั่นแก่น

พลิกดินแดนป่ากว้าง                  เป็นเมืองบ้านฮูงเฮือง

กลางใจเมืองมีหนองน้ำ             ใสงามกว้างใหญ่

พันสี่ร้อยไร่ฮวมดินน้ำ                  ทางอ้อมได้ห้าโล

มีร้านโชว์สินค้า                             ไหมไทยขายส่ง

พ่อองค์ดำอยู่ขอบข่าง                 ฮิมหนองน้ำสง่างาม

กุดนาขามลือชื่อ                            มีฝีมือทางช่าง

ราชินีส่งเสริมสร้าง                        เป็นศูนย์ให้ได้เพิงพา

เสด็จมาแต่ละครั้ง                          เป็นความหวังอันยิ่งใหญ่

ขายผ้าไหมผ้าฝ้าย                          ผลิตภัณฑ์ได้ทั่วกัน

อัศจรรย์ยามเดือนห้า                      เมษายนคนมาเที่ยว

ขี่ยางเล่นเลาะเลี้ยว                         กลางหนองน้ำหยอกล้อกัน

สานสัมพันธ์เหนียวแน่น                     เป็นแฟนกันฮอดมื้อแก่

ฮักดูแลกันฮอดมื้อ                          ถือไม้เท้าซ่อยกัน พี่น้องเอย

 

 


2 thoughts on “ผญาแนะนำสถานที่

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *